Hargeysa - Madaxweyne marka hore salaan iga gudoon, Madaxweyne, Aniga oo ah muwaadin Somalilander ah jecelna horumarka islamarkaana ka mid ahaa ragii sida diiran kuugu soo dhaweeyey markii aad timi U.A.E. Waxaan maqlay intii aan maqnaa warar tibaaxaya in aad waayo aragnimo wayn ka qaadatay safaradaadii qurbaha oo ku wajahan bilicda iyo muuqaalada guud ee ay lahaayeen Caasimadaha kala duwan ee dunida isla markaana aad go’aansatay in aad dalkeena u yeesho muuqaalo lamid ah kuwaa wadamada dibeda,

adiga oo dhismayaashii dawlada ee shaaricyada waaweyn u dhawaa gabi ahaanba aad ku guda jiro iibintooda kuwa badan oo horena aad ka xaraashtay Ganacsadayaal si ay uga dhisaan Sarar dhaadheer oo labaataneeyo dabaq ah. madaxweyne in aad ku fikirto in aad abuurto wax lagagu xusuusto oo jiilka soo socdaa uuna ilaaawin magacaaga waa arin geesinimo leh.

Madaxweyne, doorashadii madaxweynaha laguugu doortay May 2002, waxaan ahaa ragii geed –gaaban iyo mid dheerba u fuulay sidaad ugu guulaysan lahayd, xitaa waxaad la socotaa in uuna wakhtigaa jirin bahalkan magaca adag leh ee Surf – ka la yidhaahdo ee la magac ah masiibadii 29 October Makhsinka kuugu soo gashay oo waxaa ii suura gashay oo aan codeeyey dhawr iyo toban jeer oo aan ku noqnoqday, balse waxa isku key qaban wayday markii natiijadii codbixinta lagu dhawaaqay,

adiga oo hogaaminta qaranka xumaan iyo wanaag wax lagaa arkay aanay jirin wakhtigaa , xilka madaxweynenimana aad haysay wax ka yar sannad, Kharash laga warwaraan uuna meesha oolin oo uu halyeygii reer Kenya garbahaagaa taagnaa , anigoo u yaraana aan kuu codeeyey dhawr iyo toban jeer in aad ku foosno 80cod wax ka yar, waxay ahayd arin fajiciso ah haddaba maanta oo aad dalka hogaanka aad u haysay todoba sanno ku dhawaad aad ogtahayna muddadaa aynu sare kusoo xusnay wixii qarankan ku habsaday sida:

- macaluusha,
- barakaca,
- tahriibka ,
- kalataga,
- qaranjabka,
- qaraxyada,
- amaandarada,
- xidhiidh-xumada wadamada jaarka,
- niyad-jabka beesha caalamka ku dhacday,
- dimoqoraadiyada ladagaalanka ,
- doorasho nacaybka,
- saxaafad cabudhinta
- iyo kali-talisnimadda
ma waxaad haweysan kartaa madaxweyne xitaa inaad 10 cod oo kali ah ka hesho shacabka Somaliland?

Waxaan madaxweyne kugula talin lahaa in aynu bishaa ama labadaa bilood ee doorshada ka hadhay ka faa idaysano kolay waxaa laydhi aduunyadu ma tobnowde e oo waxaad ogtahay in “Bilgate” oo kamid ah maal qabeenada aduunka ugu waaweyn uu halgan aduunyo iyo waxsoo kordhin uu ku mashquulsan yahay.

Madaxweyne , markaan dalka imid , waxaan arkay iyada oo meelihii aan ku taamayey in aan iibsado ee ay kamid ahaayeen India lineska aan arkay iyada oo jiingad lagu wada wareejistay oo lagu kala calafqaaday , waxaan ku fikiray oo aan is idhi madaxweynuhu hakaa iibsho boqcadaa Dugsiga Sheikh Bashiir oo ku haboon in laga bineeyo dhismo ganacsi oo caalamiya , waxaa la iisheegay in halkaa uuna wax fursad ahi iiga banaanayn!! Waxaan hungureeyey garoonkii Hargeisa stadium oo aan is idhi waa meel ku haboon in laga dhiso warshado oo halkaa anigu awood uma helaayo oo lacagteedaa badane in aan kusoo hago maalqabeenada carbeed , iyana cidii aan waydiiyey waxaabay iigu jawaabeen adaa dayacay qorshahaagaa oo haddii aad Maxamud Haybe oo arimahaa u dhuun daloola markaad maqnayd lasoo hadli lahayd !!!

Hadaba , Madaxweyne waxaan kaa codsanayaa , waxaan balaf ku maqlay hadal hayn kusaabsan gurigii gabadhii ina Siyaad Bare ku lahayd hargeisa , doorashadiina fooda ayay inagu soo haysaa, waxaa layidhi nin weyni wadkii waa yaqaan, markaan ku leeyahay gurigii ina siyaad waad i fahantay ayaan filayaa , farta yaryar ayaan wax kuugu sheegayaa ta waaweyn waa la ina fahmayaa , markay toban maalmood ka hadhsan yihiin doorashada waxaad u wareegtaa guriga aad ka dhisatay dhismaha baarlamaanka xagiisa dambe, waxaad leedahay gurigii waxaa kusoo baxay Jugihii qaraxyadii 29 oct oo habeenkii gariir ayaan dareemaa waxaanan ka baqay inuu igu dumo, dib u burburin iyo dib u dhis ayuu u baahan yahay , tani waa talo aan garaad kayga kooban aan ka keenaye , talooyinka lagu aflaxo iyo farsamooyinka cilmiyeysan Ambassadorka ayaa alle bareya isaga ayaa ina tilmaami doona.

waxaan rajaynayaa in aad aniga isiin doonto tixgelinta kowaad.

Wabillahi tawfiq

Cabdirasaaq Sh Cali Askar
Hargeisa, 4418174
ixsaan2002@hotmail.com