Markabkan oo lagu magacaabo MV Rim oo laga qafaashay biyaha Gacanka Cadmeed, waxa saaran shaqaale tiradoodu dhan tahay 17 qof, waxana afduubay 10 nin oo dhammaantood ka soo jeeda degaanka Laasqoray, iyadoo afduubka markabkaasna caalamka oo dhan shalay laga wada ogaaday.

Haseyeeshee, saraakiisha sare ee ciidanka ilaalada xeebaha Somaliland, ayaa iyagu sheegay haba yaraatee in aanay wax xog ah ka hayn marka la qafaashay, marka laga reebo maqalka wararka idaacaduhu ka baahinayeen dhacdadaas.

Ku-simaha Taliyaha, ahna Taliye-ku-xigeenka Ciidanka Ilaalada Xeebaha Somaliland Mr. Axmed Cali Faarax oo saxaafa uga waramey isagoo ku sugan magaalada Berbera oo wax laga weydiiyey waxa ay ka ogyihiin markabka kooxaha budhcad-badeedda ah la tageen xeebaha Degmada Laasqoray ee Gobolka Sanaag, ayaa sheegay in aanay falkaas ka hayn xogo ka baxsan warka idaacaduhu faafiyeen eek u saabsan markabkaas.

Laakiin, waxa Taliyuhu tibaaxay in markabkaas oo laga leeyahay dalka Liibiya loo sheegay in kooxda budcadda ah subaxnimadii hore shalay la tageen meel la yidhaa Gacan oo ka tirsan dhul-xeebeedka Degmada Laasqoray.

“Ilaa hadda ma hayno warar aan ahayn kuwa idaacadaha laga baahiyey ahayn oo la xidhiidha markabka la sheegay in budhcad-badeedu la tageen Laasqoray, laakiin sidaanu maqalay markabkaas waxa laga leeyahay dalka Liibiya, meesha lala tegayna waxa la yidhaa Gacan oo way ka shishaysaa Laasqoray,” ayuu yidhi Taliye Axmed Cali.

Geesta kale, odayaasha, culimaa’udiinka iyo dadweynaha degmada Laasqoray, ayaa shalay galab ku guulastay inay ku qanciyaan kooxdii markabkaasi soo af-duubtay inay ka kaxeeyaan degaanka oo ay meel kale la tagaan.

Oday Amiin oo la waydiiyey in kooxda budhcad-badeedda markabka af-duubtay yihiin dad deegaanka u dhashay, waxa uu ku jawaabay; “Dad degaanka iyo dad kalena way isugu jireen, may ahayn dad khaas ah ee isku jira ayey ahaayeen.”

mar wax laga weydiiyey in ciidanka Ilaalada Xeebaha Somaliland ama masuuliyiin reer Somaliland ah gacan ka geysteen wax gacan ah ka gaysteen arrintaasi, waxa uu yidhi; “Wax ilaa hadda ciidan ah oo u dhaqdhaqaaqay dhinaca qolyahan Puntland iyo Somaliland ilaa hadda noomaga muuqdo magaalada ee waxa nooga muuqda iyaga, hantidoodii iyo diyaargarowgoodii, laakiin odayaasha deegaanka ayaa af ahaan kaga soo horjeedsaday.

Dadka taageeray waxay ahaayeen dad markii horeba ku jiray oo u go’ay budhcad-badeedda dhulka amma badda ha u joogeene.”

Ma aha markii ugu horreysay ee koox budhcad-badeed ah maraakiib ay afduubeen la tagaan degaanka Laasqoray, balse sannadkii hore ayaa budhcad degaankaas u dhashay xeebahaas la tageen markab nooca saliidda qaada ah oo laga leeyahay waddanka Masar. Haseyeeshee dhawr bilood kadib, ayaa shaqaalihii markabka saarnaa waxa u suurtogashay fursad ay dagaal culus kadib kaga fakadeen afduubayaasha, isla markaana gacanta ku dhigeen qaar ka mid ah budhcaddii qafaalashada ku haystay, sidaana iyagoo bedqaba ugu laabteen dalkoodii.